Қазақстан азаматтары еңбекке, оқу-білім мен одан әрі өсуге ұмтылулары керек –ҚР Президенті

10 Сәуір, 2015 12:54

Қазақстан жас, дамып келе жатқан мемлекет және оның азаматтары еңбек пен оқу-білімге және одан әрі өсуге ұмтылулары керек,-деді бүгін Президент Нұрсұлтан Назарбаев «Ұлт Көшбасшысымен – жаңа жеңістерге» атты жастар форумында.

Президент ол үшін мемлекет тарапынан барлық шаралардың қолға алынып жатқандығын айтты. Алайда, алдыға қарай серпіліс жасау үшін инновациялық технологиялар керек. Ал, оларды саяси аренадағы бәсекелестік жағдайында ешкім де тектен-тек бере салмайды.

«Сондықтан мемлекет жастардың дамуына барлық жағдай жасап отыр. Индустрияны дамытып жатырмыз, өйткенi, нарықтық жағдайда мемлекеттiң алдында тұрған басты мәселе жұмыс орындарын құру болып отыр, ал қалғанын адам өзi жасауы тиiс. Жолдарды, электр желiлерiн салып жатырмыз, аграрлық сектор, бiлiм, денсаулық сақтау салаларын дамытып жатырмыз. Ғылымға жол ашық, инновация, ғылымсыз бiз дамыған 30 елдiң қатарына қосыла алмаймыз», - деп атап өттi Елбасы.

Бұған қоса Елбасы жастарға білім алудың маңыздылығын атап өтті.

«Өзіңнің бойыңдағы дарының мен еңбегіңнің арқасында өсу жолыңды таңдап, қоғамда өз орныңда табу өте маңызды»,-деді Қазақстан Президенті.