Алматы өңірі алдыңғы қатарлы халықаралық тау шаңғысы орталықтарының біріне айналуы мүмкін – Халықаралық Туристік ұйымның Бас хатшысы
«Алматы өңірі табиғи-климаттық, аймақтық, геосаяси артықшылықтарымен алдыңғы қатарлы халықаралық тау шаңғысы орталықтарының біріне айнала алады», - деді Алматыдағы «Қысқы туризмнің жаңа туристік бағыттарын дамыту» тау шаңғысы курорты бойынша бірінші Еуразиялық конференцияда Халықаралық Туристік ұйымның Бас хатшысы Талеб Рифаи.
Т.Рифаидің айтуынша, әлемде көптеген тау шаңғысы курорттары жұмыс істеуде және бұл сала тез дамиды.
«Туризмнің өсуі мен дамуы – адамдардың өмір сүрудің жоғары деңгейіне жетуге үлкен пайда. Біздің мақсатымыз – жетілу мен дамуымыздың экологияға кесірлі болмауы. Бұл ұстанымды осы жерде қабылдайық», - деді Т.Рифаи.
Сонымен қатар, ашылу салтанатына қатысқан қала әкімі Ахметжан Есімов дағдарыс кезінде құлдырамай керісінше 4 пайызға көтерілген жалғыз саланың туризм екенін айтты. Бұл өз кезегінде өзге салаларға да демеу болып, жаңа жұмыс орындарының ашылуына жағдай жасады. Оның үстіне бұл мемлекет субсидиясынсыз жүзеге асты.
«Алматы Қазақстан Республикасының мәдени, білім беру, ғылым мен туристік орталығы болып табылады. Елдің негізгі әлеуеті осында орналасқан. Қала мемлекет көлемінде ЖІӨ-нің бестен бірін, барлық салықтың үштен бірін, мемлекет бюджеті табысының 25 пайызын және туристік саладағы қызметтердің 55 пайызын құрайды», - деді қала әкімі.
