Қазақстан мен Германия ЕАЭО аясындағы сауда-экономикалық ынтымақтастық мәселесін талқыға салды
«Сапарды ұйымдастырудағы басты мақсат – екі елдің Еуразиялық экономикалық одақ аясындағы сауда-экономикалық ынтымақтастықтың өзекті мәселелерін талқылау және мемлекеттік қаржы жүйесі қызметі бойынша тәжірибе алмасу болып табылады»,-делінген хабарламада.
Қазақстандық делегация құрамында Ұлттық экономика вице-министрі Марат Құсайынов, Ұлттық банк төрағасының орынбасары Олег Смоляков, Әділет вице-министрі Зәуреш Баймолдина, Инвестициялар және даму министрінің орынбасары Ерлан Сағадиев, «Бәйтерек» ҰБХ» акционерлік қоғамының басқарма мүшесі Қаныш Төлеушин, сонымен қатар министрліктер мен ведомстволардың, даму институттарының жауапты мамандары бар.
Бейсенбі күні Бақытжан Сағынтаев Германияның бірқатар ресми тұлғалары мен жекелеген компания өкілдерімен және басшыларымен кездесті. Кездесуде инвестициялық ынтымақтастық мәселесіне қатысты кең ауқымда пікір алмасылды және германиялық компаниялардың Қазақстандағы қызметі бағытында нақты жобалар талқыланды.
Германияның жетекші экономикалық бірлестіктері мен ірі неміс компаниялары өкілдерінің қатысуымен өткен «ЕАЭО аясындағы неміс бизнесінің Қазақстандағы мүмкіндіктері» атты дөңгелек үстел отырысында Б.Сағынтаев Германияның іскерлік топтарын «Нұрлы жол» жаңа экономикалық саясаты мен ЕАЭО аясындағы неміс компаниялары мен бизнесі үшін тиімді басым бағыттар мен мүмкіндіктер жөнінде ақпараттандырды. Қазақстандық тарап германиялық бизнесмендердің сауалдарына нақты жауаптар берді.
Өз кезегінде Германияның іскер топтары Қазақстанда шетелдік инвестициялардың көптеп келуіне қажетті салмақты құқықтық және институцоналдық база жасалғандығын айтты. Олар сонымен қатар, немістер тек Қазақстанның шикізатына ғана қызығып қоймай, ел экономикасының жаңа перспективалы бағыттарына да қаржы салуға дайын екендіктерін білдірді. Олардың айтуларынша, соңғы уақытта айтарлықтай ұлғайған еуразиялық кеңістік Қазақстанды неміс инвестициялары үшін аса тартымды етіп отыр. Мұндай жағдайда Германия Қазақстанның индуриализацияландыру үдерісінде мықты тірек бола алады.
