Ұлы Отан соғысының ардагерлеріне 5,8 млрд теңге көлемінде бір реттік материалдық көмек беріледі - ДСӘДМ

9 Сәуір, 2015 16:42

2015 жылы Ұлы Отан соғысына (ҰОС) қатысқандар мен мүгедектерге, оларға теңестірілген тұлғаларға, тыл еңбеккерлеріне және Ұлы Отан соғысындағы Жеңіске үлес қосқан ҚР өзге де азаматтарына бір реттік материалдық көмек беруге республикалық бюджетте 5,8 млрд. теңге қарастырылды, деді ОКҚ брифингінде ҚР Денсаулық сақтау және әлеуметтік даму вице-министрі Светлана Жақыпова.

«Ұлы Отан соғысының ардагерлеріне 5,8 млрд теңге көлемінде материалдық көмек беріледі. Нақты айтқанда, бір реттік материалдық көмек келесі ретте қарастырылған», - деді ол.

Сондай-ақ, С.Жақыпова атап өткендей, ҰОС қатысқандар мен мүгедектерге – 100 мың теңге қарастырылған.

«ҰОС қатысқандар мен мүгедектерге теңестірілген тұлғаларға, Жеңіске үлес қосқан азаматтарға – 70 мың теңге, ҰОС кезінде қаза тапқан әскери қызметкерлердің жұбайларына, ата-аналарына, Ленинград қоршауында болған тұрғындарға және Екінші дүниежүзілік соғыс жылдары фашистер мен олардың одақтастары құрған концлагерлерде, гетто және өзге де мәжбүрлеп ұстау орындарында кәмелеттік жасқа дейін тұтқында болғандарға – 30 мың теңге берілмек», - деді ол.

Сондай-ақ, тыл еңбеккерлеріне және Ұлы Отан соғысының қайтыс болған мүгедектерінің жұбайларына, Ұлы Отан соғысындағы Жеңіске қосқан үлесі үшін оларға теңестірілген тұлғаларға – 25 мың теңге беріледі. ҚР Үкіметінің 2014 жылғы 16 қазандағы №1105 Қаулысына сәйкес бекітілген Қазақстан Республикасында Жеңістің 70 жылдығына дайындық және өткізу жөніндегі іс-шаралар жоспарында 50-ден астам іс-шара қарастырылған.

Индира Қауметова

Барлық жаңалықтар