• Басты
  • Қазақстанның астанасында кәмелетке толмағандар арасындағы қылмыстар саны азайды

Қазақстанның астанасында кәмелетке толмағандар арасындағы қылмыстар саны азайды

9 Сәуір, 2015 15:21
Астанада кәмелетке толмаған жасөспірімдер арасындағы қылмыстық істер азайды, деп хабарлады Астана қаласының жасөспірімдер ісі жөніндегі мамандандырылған ауданаралық сотының төрайымы Нәзиля Раззақ Орталық коммуникациялар қызметінде өткен баспасөз-мәслихатында.

«Бүгінгі таңда Астана қаласының сотында кәмелетке толмағандардың істері бойынша қаралған қылмыстық істер саны азайды. Біз өз қызметімізді бастаған 2008-2009 жылдар аралығында мұндай істер 160-180-ді құраса, өткен жылы біз небәрі 89  істі қарадық, бұл әрине қуантарлық жаңалық»,-деді Н.Раззақ.

Бұл ретте ол бұрындары жасөспірімдер бірінші шығарылған үкім талаптары орындалмай жатып, екінші рет қылмысқа бой алдырса, бүгінгі таңда жағдай айтарлықтай дұрысталып келе жатқандығын атап өтті. Яғни жәсөспірімдердің бұрынғыдай кәмелетке толмай жатып екінші қайтара істі болу жағдайлары күрт төмендеді.  Қазіргі таңда олар сауықтыру шараларымен қамтылып, спортпен, өнермен шұғылданып, еңбек етеді, педагог азаматтармен тілдеседі.

«Осылайша қылмыстық істер саны елордада азайды, алайда әкімшілік істер саны артып отыр.  Кәмелетке толмаған жасөспірімдер түнгі уақыттарда ересектер тарапынан қараусыз жападан-жалғыз жүруді жиілетті. 2013-2014 жылдары осындай баппен 500-600 іс қаралған, ал биылғы 3 айдың өзінде мұндай істер 500-ден асып кетті»,-деді Н.Раззақ.

Индира Кауметова

 

 

Барлық жаңалықтар