California Film Awards мүсіншесі Қазақстанның Испаниядағы Елшілігіне «Қарағандыда жоғалғандар» фильмі үшін табыс етілді

9 Сәуір, 2015 19:51

Қазақстанның Испаниядағы Елшілігі «Қарағандыда жоғалғандар» атты қазақстан-испандық фильміне қатысушылар мен испандық жетекші БАҚ өкілдеріне брифинг ұйымдастырды, деп хабарлады СІМ.

Брифинг шеңберінде «Nexos» Қауымдастығы Президенті Энрике Гаспар ҚР Елшісі Бақыт Дүйсенбаевқа California Film Awards мүсіншесін табыс етті.

ҚР Елшісі сөйлеген сөзінде «Қарағандыда жоғалғандар» қазақстан-испандық фильмнің түсірілуіне және жарық көруіне ат салысқан барлық қатысушыларға және осы тақырыпқа назар аударған БАҚ өкілдеріне алғыс айтты.

«Біздің бірлескен еңбегіміз назардан тыс қалған жоқ, біздің «Қарағандыда ұмытылғандар» фильмі 2014 жылдың ең үздік деректі фильмі номинациясында жеңіп, California Film Awards гауһар марапатына ие болды, сондай-ақ Джакартадағы (Индонезия) кинофестивальде ең үздік еуропалық деректі фильм атанды»,-деп атап өтті Б. Дүйсенбаев.

Өз кезегінде, «Nexos» Қауымдастығы Президенті Энрике Гаспар фильмнің жарық көруіне жан-жақты көмек көрсеткені үшін Қазақстан Үкіметіне, атап айтқанда, СІМ мен Елшілікке алғысын білдірді.

Брифинг барысында ақпараттық-имидждік материалдар таратылып, Қазақстан туралы тақырыптық фотокөрме ұйымдастырылды.