ЕЭК ЕАЭО елдері үшін алдағы 2-3 жылдың көлемінде роуминг қызметінің тарифтерін арзандатуды қарастырмақ

9 Сәуір, 2015 12:53

Еуропалық экономикалық комиссия (ЕЭК) Еуразиялық экономикалық одақ (ЕАЭО) елдері үшін 2-3 жылдың көлемінде роуминг қызметінің тарифтерін төмендетпек, деді Еуразиялық экономикалық комиссияның (ЕЭК) бәсекелестік және монополияға қарсы реттеу алқасының мүшесі (министр) Нұрлан Алдабергенов «ЕАЭО пен Қазақстанның монополияға қарсы заңнамалары» атты форумның аясында.

Халықаралық байланыс қызметі нарығында Еуропалық Одақ тәжірибесі негізінде ЕАЭО мемлекеттері үшін роуминг қызметінің бағаларын бірте-бірте төмендете отырып, түбінде тегін ету мәселесі қарастырылуда.

«Қазіргі таңда ЕЭК арнайы жұмыс тобын құрды. Өйткені биылғы жылдың 1-қаңтарынан бастап, трансшекаралық нарықты бақылау өкілеттігі берілді, ал роуминг трансшекаралық нарық, сол себепті біз осы мәселе бойынша тиісті жұмыстарды бастадық. Бұл жұмыстарды талапқа сай жүзеге асыру үшін бірқатар заңнамалар мен заңнамалық актілерге өзгерістер енгізу қажет болады, ал оған уақыт керек. Дегенмен, біздің алдын ала жасаған есептеріміз бойынша, алдағы 2-3 жылдың көлемінде біз мәселені шешіп, жұмысы аяқтаймыз деген ойдамын»,-деді Н.Алдабергенов.

Аталмыш шара жұмыс күштері мен бизнестің ЕАЭО аясында еркін қимылдап, телекоммуникациялық жүйелердің дамуына ықпал етеді.

«Еуропалық тәжірибеге зер салатын болсақ, 2015 жылдан бастап роуминг қызметі оларда тегін болуға жақындап қалды. Басқаша айтқанда, Еуропа бұл мәселені шешті, сол себепті біз де өзіміздің монополияға қарсы күрес қызметімен бірге бұл міндетті сәтті жүзеге асырамыз деген ойдамын»,-деді ол.

Камила Амирова

Барлық жаңалықтар