Талдықорғанда жаңартылған энергия көздері жобаларына мониторинг жүргізу мәселесі талқыланды

10 Сәуір, 2015 09:06

Талдықорғанда облыс әкімінің орынбасары Серік Тұрдалиевтің төрағалығымен ҚР Энергетика министрлігінің көшпелі отырысы өтті. Басқосу Алматы облысында жаңартылған энергия көздерін пайдалану жобаларының орындалу барысына мониторингілеуді мақсат етті, деп хабарлады облыс әкімдігі.

Жиынға ҚР Энергетика министрлігі Жаңартылған энергия көздері жөніндегі департаменттің директоры Айнұр Сапарбекова, сол сияқты жұмыс істеп тұрған ЖЭК нысандарының өкілдері және 2015-2020 жылдарға жоспарланған ЖЭК жобаларын жүзеге асырушылар қатысты. Басқосу барысында Энергетика министрлігі «Қазақстанда ЖЭК-ні қолдау жүйесі» жайында презентация жасады.

Жиынға қатысушылар облыста 2006-2020 жылдарға арналған су және жел энергетикасын дамыту бағдарламасы жүзеге асырылып жатқанын айтты. Осы бағдарлама аясында облыста 2008 жылы жалпы жобалық қуаты 324,3 МВт болатын Мойнақ СЭС-і, 8 шағын СЭС, 1 күн электр стансасы іске қосылған. Жүзеге асырылған жобаларды қосқанда облыстың электр энергетикасының әлеуеті - Қапшағай мен Мойнақ ірі СЭС-тері, 16 шағын СЭС және 1 күн энергетикасы негізінде жалпы белгіленген қуатты 749,5 МВт.

Бағдарлама шеңберінде 2020 жылға дейін 58 компания ЖЭК қолданатын 129 нысанның құрылысы жобасын жүзеге асыруға тиетті. Оның ішінде жалпы қуаттылығы 2732 МВТт болатын 104 СЭС, 14 ЖЭС, 11 КЭС бар. Қазіргі кезде Сарқан ауданында Төменгі және Жоғарғы Басқан СЭС-1, Лепсі СЭС-2, Еңбекшіқазақ ауданында Есік СЭС-1 мен биоэлектр стансасының құрылыстары басталды.

Сонымен қатар облыста тағы 13 инвестор-компаниялар ЖЭК жобаларын қаржыландыруға қатысуға ниет білдіріп отыр.