ҚР Үкіметі Мәжілістің қарауына бірқатар заң жобасын енгізді

8 Сәуір, 2015 20:01

Үкімет «Қазақстан Республикасындағы сот-сараптама қызметі туралы» заң жобасын Мәжіліс қарауына енгізді, деп хабарлады Мәжіліс.

Онда сот-сараптамалар жүргізу жөніндегі мемлекеттік функцияларды денсаулық сақтау жүйесінен Әділет министрлігіне беру арқылы бір ведомоствода орталықтандыру, сот сараптамасы органдарын қадрлық және материалдық-техникалық қамтамасыз етуді нығайту, сот сарапшыларының ғылыми әлеуетін қалыптастыру үшін жағдай жасау, мемлекеттік емес сот сараптамасы институтын одан әрі дамытуды ынталандыру, сот төрелігіне қатысушы азаматтар мен ұйымдардың құқықтық қорғалуын, сот сарапшысы лауазымының беделін және оның әлеуметтік қорғалуын арттыру көзделген.

Сот-сараптамалар жүргізу жөніндегі мемлекеттік функцияларды денсаулық сақтау жүйесінен Әділет министрлігіне беру «Халық денсаулығы және денсаулық сақтау жүйесі туралы» Қазақстан Республикасы Кодексіне өзгерістер енгізуді қажет етеді. Осы бағыттағы заң жобасы да Үкіметтен Мәжіліс қарауына түсті.

Сондай-ақ, Мәжіліс қоржыны «Төрелік туралы» заң жобасымен толықты.

Бұл құжат ҚР Президенті Н.Назарбаевтың Парламенттің бесінші шақырылымының төртінші сессиясының ашылуында берген төрелік туралы бірыңғай заң әзірлеу тапсырмасын орындау үшін әзірленген.

Заң жобасының мақсаты – төрелік саласын реттейтін заңнаманы жетілдіру, жалпы дауларды реттеудің балама жүйесін дамыту, құзретті (мемлекеттік) соттарға жүктемені азайту.

Осы заң жобасына ілеспелі құжат болып табылатын «Қазақстан Республикасының кейбір заңнамалық актілеріне төрелік мәселелері бойынша өзгерістер мен толықтырулар енгізу туралы» заң жобасы еліміздің заңнамалық актілерінің жекелеген нормаларын «Төрелік туралы» заң жобасының ережелеріне сәйкес келтіруді қажет етеді.

Осыған орай, Азаматтық процестік және Әкімшілік құқық бұзушылық туралы кодекстерге түзетулер енгізу көзделеді.