Астаналық студенттер Қазақстанның этномәдени бірлестіктерінің қызметімен танысты (ФОТО)

8 Сәуір, 2015 17:47

Бүгін «Астана» ұлттық сурет галереясының кітапханалық зерттеу қызметі Қазақстан халқы Ассамблеясының 20 жылдығына арналған «Келісімнің күші мықты» атты кітапханалық жоба аясында «Біз бірге болғанда…» атты ұранымен студенттер мен оқырмандардың этномәдени бірлестігі өкілдерімен кездесуін ұйымдастырды.

«1995 жылдың 1-наурызы күні ҚР Президенті жаңа институт – Қазақстан халқы Ассамблеясын құру туралы Жарлыққа қол қойды. Бұл тарихи дата тәуелсіз, дербес Қазақстанды құрудағы, заманауй мемлекет құрылымын құрудағы, бейбітшілік, бірлік пен Қазақстан халқының қоғамдық келісімі идеясын іске асырудағы жаңа қадам болды. 20 жыл ішінде Ассамблея төзімділік пен еліміздің барлық этностарының арасындағы қоғамдық келісімнің қазақстандық үлгісінің маңызды бөлігі болды»,-деді оқырмандарды қабылдау бөлімінің жоғары дәрежелі кітапханашысы Бақытжан Омаров.

Осылайша шараға қатысушылар ұлтаралық мәдениеттің негізін құрайтын еліміздегі түрлі этностарының әдеп-ғұрыптарымен танысты. Сонымен қатар шараға қатысушылардың назарына Қазақстанда тұратын азаматтардың мәдениетаралық байланыстарына бағытталған «Достық әлемі-Планета дружбы» атты кітап көрмесі ұсынылды.

Бұған қоса, кездесуде «Веселки», «Ладушки», «Әжелер шаңырақ ансамблі» халық ансамбльдерінің концерті ұйымдастырылды.

Кездесуге қонақ ретінде елорданың түрлі этномәдени бірлестіктерінің өкілдері келді.

Индира Кауметова

Фото Азамата Алиева