• Басты
  • Әділет министрлігі кәсіпорын ашумен байланысты процедураларды жеңілдетті

Әділет министрлігі кәсіпорын ашумен байланысты процедураларды жеңілдетті

8 Сәуір, 2015 16:05
Кәсіпорын ашумен байланысты процедуралар жеңілдетілді, деп хабарлады Әділет вице-министрі Бақытжан Әбдірайымов Орталық коммуникациялар қызметінде өткен баспасөз-мәслихатында.

«Кәсіпорын ашумен байланысты қолданыстағы заңнамаларға өзгерістер енгізілді. Бұрын елімізде қандай да бір кәсіпорын ашу үшін түрлі анықтамаларды зерделеп, қандай да бір шешімдер шығарып, құжаттарды нотариус арқылы рәсімдеу қажет болатын. Осындай қиындықтардан арылу мақсатында 2015 жылдан бастап, кәсіпорын ашуға қажетті құжаттар электронды форматқа көшірілді. Енді барлық жұмыстарды Әділет министрлігінің өкілдері атқарады»-деді Б.Әбдірайым.

Оның сөзінше, енді кәсіпкерге кәсіпорын ашу үшін  өтініш беру ғана қалды.    

«Кәсіпорында ашуға кәсіпкердің 1 күн ғана уақыты кететін болады. Яғни кәсіпкерге есеп ашылады, қосымша қызметтердің қажеті жоқ. Қазір бұл қызмет түрі тегін. Жарғылық капитал қоры да қажет емес»,-деп жалғады сөзін министрдің орынбасары.

Жалпы алғанда, оның айтуынша, бүгінгі таңда «Нұрлы жол – болашаққа бастар жол» бағдарламасының арқасында кәсіпкерлікпен айналысқысы келетін азаматтарға елде барлық мүмкіндіктер жасалған.   

  

 

Барлық жаңалықтар