«ҚазАльянстың» қатары Германия мен Ресейдегі қазақстандық студенттер ұйымдарымен толықты

9 Сәуір, 2015 08:51

Ресей, Германия оқу орындарында білім алатын Қазақстан студенттері «ҚазАльянс» шетелдегі қазақстандық жастардың ортақ бірлестігіне бірігу туралы Декларацияны қабылдап, қол қойды, деп хабарлады «Қазақстан-2050» жалпыұлттық қозғалысының баспасөз қызметі.

Германиядағы Қазақстан студенттері қауымдастығы және Мәскеу мен Санкт-Петербург қалаларындағы қазақстандық студенттер бірлестіктерінің өкілдері біртұтас бірлестіктің бір бөлігі болуға ниеттеніп, шалғай қашықтыққа қарамастан бірыңғай ақпараттық алаңның қажеттілігіне бірауыздан келісті.

«Бүгінде Ресей ЖОО Қазақстан студенттері қауымдастығы құрамына 27 000 адам кіреді. Олардың ішінде ең ірілерінің бірі Мәскеу қаласындағы қазақстандық студенттер бірлестігі және Санкт-Петербург қаласындағы «Достар» бірлестігі. Біздің бүгінгі бірігуіміз басқа қалалардағы студенттер ұйымдары үшін үлгі болады деп ойлаймыз», - дейді Ресейдегі қазақстандық студенттер ЖОО бірлестігінің төрағасы Бахтияр Қожамжар.

Ресей мен Германия ыңғайлы географиялық орналасуына және олардағы тегін немесе оқу ақысы төмен оқу орындарының көп болуына байланысты қазірде қазақстандық студенттердің ең көп шоғырланған елдердің бірі. «Қазальянс» аясына бірігу идеясын мұның алдында америкалық, корей және кейбір еуропалық оқу орындарының студенттері қолдап, оның құрамына ену туралы декларацияға қол қойған болатын.

Барлық жаңалықтар