Еліміз өсіп – өркендеп, тәуелсіздігіміз тұғырлы, татулығымыз мәңгілік болсын – ардагер

8 Сәуір, 2015 11:39

Ұлы Отан соғысындағы жеңістің 70 жылдығына орай, ОҚО ТЖД «Өрт сөндіру және авариялық - құтқару жұмыстары қызметі» ММ Шымкент қаласындағы №40 өрт сөндіру бөлімінің жеке құрамы соғыс ардагері Қалтай Бектасовпен кездесу өткізді, деп хабарлады ҚР ІІМ ТЖК.

Кездесу Шымкент қаласы №105 Мукими атындағы жалпы орта мектебінде өтті. Шара барысында жиналғандар назарына мектеп оқушылары ұйымдастырған концерттік бағдарлама ұсынылды. Онан соң қарт майдангер өрт сөндіру бөлімінің тыныс - тіршілігімен танысып, ел қауіпсіздігі үшін қызмет етіп жүрген жауынгерлерге шын алғысын білдірді.

«Еліміз өсіп – өркендеп, тәуелсіздігіміз тұғырлы, татулығымыз мәңгілік болсын. Соғыс ешқашан болмасын»,- деді ардагер өз тілегінде.

Қалтай Бектасов - соғыс жылдары майданда байланысшы болған. От пен оқтың ортасында желіні жүргізіп, Жеңіс күнін жақындатуға өз үлесін қосқан азамат.

Соғыс аяқталған соң Жапон ұрысына қатысып, елге тек 1946 жылы оралған. Отанға келгесін ол «Тоғыс» кен орнында шахтер болып қызмет атқарып, зейнетке шығады. Өз іскерлігінің арқасында бірнеше рет ҚазССР Жоғарғы Кеңесінің депутаты болып сайланған.

Ел алдындағы ерен еңбегі еленіп, Оңтүстік Қазақстан облысы Сайрам ауданының «Құрметті азаматы» атағы берілген Қалтай Бектасов, жасы 90-нан асса да әлі тың, қимылдары ширақ. Жұбайы екеуі 7 ұл-қыз тәрбиелеп, барлығын да азамат қатарына қосқан.

Барлық жаңалықтар