Қостанай облысының құтқарушылары ҰОС ардагеріне барды

8 Сәуір, 2015 08:53

Ұлы Отан соғысы жеңісінің 70 жылдығы қарсаңында Қостанай облысы ТЖД Өрт сөндіру және авариялық-құтқару жұмыстары қызметінің Әулиекөл ауданы №15 өрт сөндіру бөлімінің қызметкерлері Ұлы Отан соғысының ардагері Анна Тихоновна Федорованың үйіне барып құттықтады.

ҚР ІІМ ТЖК хабарлағандай, тоқсан жастағы қарт ана отты жылдарды басынан өткерді. Ол бұл туралы құтқарушыларға әңгімеледі.Анна Тихоновна 1924 жылы Семиозер ауылында туды. 1941 жылы орта мектепті тәмамдады. Сол жылы соғыс басталып, 17 жасар қыз комиссариатқа хат жазып майданға алуын өтінеді. «Мен де құрбыларымнан қалғым келмеді.

Жазған өтінішім 1943 жылғы 18 тамызда орындалып, майданға аттандым. Алдымен мен сияқты қыздардың басын қосып байланыс училищесінде оқытты. Оқыған біздерді 134 жеке байланыс батальоны құрамына жіберді. Мен Бірінші Прибалтийск майданында болдым. Одан әрі Риганы, Шығыс Пруссия, Кенигсбергті, Үшінші Беларуссия майданында Полоцк қаласын жаудан азат етуге қатыстым. 188 жеке жүйелік байланыс батальоны құрамында Жапониямен шайқастым», - деді ардагер әжей.

Ауыр күндерді басынан өткізген Анна Тихоновна Отан алдындағы өз міндетін абыроймен орындап, 1945 жылғы 13 қарашада елге аман-есен оралады. Омырауындағы ордендер мен медальдар оның жауынгерлік ерлігінің куәсі. Майдангер соғыстан кейін жұмысқа белсене араласып, Семиозер халық соты және Құсмұрын балалар интернатында абыройлы қызмет атқарады.

Тоқсан жастағы қария 1979 жылдан бастап құрмет демалысында. Қазіргі уақытта балаларының ортасында бақытты ғұмыр кешуде.

Құтқарушылар ардагер-әжені келе жатқан мерекемен құттықтап, сыйлық тарту етіп, игі лебіздерін білдірді. Ардагер де өзіне көрсетілген құрмет үшін өрт сөндірушілерге шексіз алғысын айтты.

Барлық жаңалықтар