Павлодарда тоғызқұмалақтан жасөспірімдер арасында чемпионат өтті

Павлодар қаласында өткен Тоғызқұмалақтан Қазақстан Республикасының 10, 12 және 14 жас аралығындағы жасөспірімдер чемпионатына, 14 облыстан, Астана және Алматы қалаларынан 246 спортшы қатысты.

Чемпионат 9 турда швейцар жүйесімен өткізілді. Әрбір ойыншыға, классикада – 1 сағат 30 минут, ал шапшаң ойында – 7 минуттан берілді.

Чемпионаттың ашылу салтанатында Павлодар облысы әкімдігінің Дене шынықтыру және спорт басқармасы спорт бөлімінің басшысы – Айнұр Мейрамқызы Қоспақова, тоғызқұмалақтан Қазақстан Республикасының бас жаттықтырушысы – Айнұр Абсадыққызы Жақапбаева, Қазақстан Республикасы Тоғызқұмалақ спорты Федерациясы төрешілер алқасының басшысы – Мейрамқұл Қопабайұлы Ноғайбаев қатысты.

Чемпионаттың бас төрешісі: Жоғарғы Ұлттық дәрежелі төреші – Шарип Кашкенов (Павлодар), бас хатшысы: Ұлттық дәрежедегі төреші – Батырхан Абильбеков (Қостанай) болды.

Барлық медаль саны бойынша ең жоғары көрсеткіштерге Қызылорда облысы (3 алтын, 2 күміс, 5 қола), Батыс Қазақстан облысы (2 алтын, 3 күміс, 1 қола) және Павлодар облысы (2 алтын, 1 күміс) қол жеткізді.

Чемпионаттың жабылу салтанатында жеңімпаздар мен жүлдегерлерге Қазақстан Республикасы Мәдениет және спорт министрлігінің Спорт және  дене шынықтыру істері Комитеті атынан медаль және дипломдармен, Павлодар облысы әкімдігінің Дене шынықтыру және спорт басқармасы мен Павлодар облыстық тоғызқұмалақ Федерациясы тарапынан бағалы сыйлықтармен марапатталып, естелік сыйлар берілді.