Маңғыстау облысында жергілікті қамту көлемін арттыру мақсатында 83 меморандумға қол қойылды
«Бүгінгі таңда индустриалды инфрақұрылым мәселесі мен өнеркәсіп кәсіпорындарының проблемалық мәселелерін шешуге үлкен маңыз берілуде. Осыған қарай аталмыш бағытта бірқатар жұмыстар атқарылып та үлгерді. Яғни жергілікті қамту көлемін арттыру мен отандық өнім өндірушілерді қолдау мақсатында, нақтырақ айтқанда, жергілікті өнім өндірушілерді инвестициялық жобалар мен мемлекеттік тендерлерге қатыстыру үшін ұлттық компаниялар мен кәсіпорындар арасында 312 миллиард теңгенің 83 меморандумына қол қойылды»,-делінген хабарламада.
Бұл бағытта таратылған ақпараттар бойынша, меморандумдарда көрсетілген талаптарды орындау үшін 282 миллиард теңгенің 226 келісімі жасалған. Өнеркәсіп кәсіпорындарын қолдау мақсатында Үкіметтің биылғы жылдың қаңтарында өткен мәжілісінің хаттамасымен бекітілген 2015 жылға арналған іс-шаралар жоспары орындалуда. Жоспарда Маңғыстау облысындағы кәсіпорындардың қызметіне қатысты 7 іс-шара қарастырылып, оның 3-уі осы уақытта жүзеге асырылып бітті.
Мысалы Ақтау желі зауытын жұмыспен қамтуда облыстың 5 мұнай компаниясымен ынтымақтатасу мақсатында ұзақмерзімді келісімдер жасалып, олардың екеуі нақты келісім-шарттарда көрініс тапты.
Бұған қоса, экономиканың өзге салаларындағы 7 компаниямен метал бөлшектерін жеткізу жөнінде келісім жасалды. «КазАзот» ЖШС жарылғыш зат ретінде амиак селитрасын жеткізіп беру бойынша «Қазақмыс», «Қазатомөнеркәсіп» ҰАК, «ERG» сауда үйі» сияқты үш компаниямен келісім жасады. Кәсіпорын үшін 2015 жылдың соңына дейін магистралды темір жол желісінің қызметтерінің тарифтері бойынша уақытша төмендетуші коэфицент бекітілді.
