Ұлттық қордан геологиялық барлау мен пайдалы қазбалардың қорын толтыру үшін 6 милиард теңге бөлінеді
«Геологиялық барлау мен пайдалы қазбалар қорын толықтыру және пайдалы қазбалардың перспективалы бөліктерін геологиялық зерттеу үшін Ұлттық қордан 6 миллиард теңге бөлінеді»,-деді М.Құсайынов.
Оның сөзінше, осы бағыттағы жұмыстардың нәтижесінде түсті металдар мен алтынды қоса алғанда пайдалы қазбалардың болжамды мөлшері анықталатын болады. Өнім сапасы инфрақұрылымын жетілдіру мақсатында сынақ базасының зәрулігімен байланысты мәселені шешу үшін Ұлттық қордан 5 миллиард теңге бөлінеді.
«Нәтижесінде жеңіл және химия өнеркәсібіндегі, металургиядағы, өрт қауіпсіздігі мен азаматтық қорғаныс және ветеринария салалары бойынша қолданыстағы сынақ зертханалары кеңейтіліп, қажетті құрылғылармен толықтырылады»,-деді министрдің орынбасары.
Бұл ретте М.Құсайынов өнім сапасы инфрақұрылымын дамыту отандық өнімнің қауіпсіздігін нығайтып, бәсекеге қабілеттілігін арттыратындығын атап өтті. Сондай-ақ ЕАЭО-на мүше мемлекеттердегі өнім сапасының сәйкестігімен байланысты кәсіпкерлік субьектілерінің шығындарын оңтайландырады.
Естеріңізге сала кетейік, 2014 жылы Қазақстан халқына жолдаған Жолдауында Мемлекет басшысы экономикалық өсім мен құрылымдық реформаларды жалғастыруға бағытталған жаңа экономикалық саясатқа көшу қажеттігін айтқан. Бағдарламаның басты мақсаты – ұзақмерзімді экономикалық өсімді қамтамасыз ету мақсатында хаб ұстанымы бойынша тиімді инфрақұрылым қалыптастыру негізінде еліміздің макроөңірлерін ықпалдастыру арқылы бірыңғай экономикалық нарық қалыптастыру болып табылады.
Индира Кауметова
