2015 жылы тікұшақ өндірісіне Ұлттық қордан 10 млрд теңге бөлінеді

«Отандық машина жасауды дамыту үшін, оның ішінде автомобильдерді, тікұшақтарды және жолаушылар вагондарды жасауға 2015 жылы Ұлттық қордан 35 млрд. теңге бөлінеді, оның ішінде автомобильдерді жасау үшін 20 млрд. теңге, тікұшақтарды жасау үшін 10 млрд. теңге, жолаушылар вагондарын жасау 5 млрд. теңге қарастырылды», - деді М.Құсайынов.

Атап айтқанда, отандық автомобиль және тікұшақ өндірушілерді қолдау ішкі нарықта шетелдік өнімдердің импортын отандық өндіріс өнімдерімен алмастыруды қамтамасыз ететін болады.

«Жалпы, қабылданып жатқан шаралар әлеуетті ішкі және сыртқы тұтынушыларға тиімді қаржылық жағдайында отандық машинажасау өнімін алуға мүмкіндік береді», - деп түйді ол.

Айта кетейік, 2014 жылы Елбасы өз Жолдауында жаңа экономикалық саясат бағдарламасын ұсынған болатын, ол  экономикалық өсім мен құрылымдық реформалардың жалғасуына бағытталған. 

Бағдарламаның басты мақсаты – экономикаға қажетті инфрақұрылымдық каркасты әзірлеу, өңірдегі бизнесте жаңа мүмкіндіктер ашу. Бағдарлама елдің бірыңғай нарығын ашуға бағытталған.

Индира Қауметова