Қазақстанда электр энергиясы тарифтерінің қалыптасу үдерісі реттелетін болады (ФОТО)

6 Сәуір, 2015 11:31

Қазақстанда электр энергиясына деген тарифтердің қалыптасу үдерісі реттелетін болады, деп хабарлады ҚР Энергетика вице-министрі Бақытжан Жақсалиев Сенат депуттарымен энергетикалық инфрақұрылымды қалыптастыру мен дамыту және электр энергетикасына қатысты заңның жүзеге асырылуына байланысты өткен кездесу барысында.

«Заң жобасы инвестициялық климатты жақсартып, электр энергиясы саласындағы субьектілерді ашық әрі тиімді қарым-қатынастармен қамтамасыз ету, электроэнергетикалық бақылау мен қадағалауды жетілдіру мақсатында дайындалып отыр. Заң жобасының аясында абоненттік төлемдерді енгізу арқылы электр энергиясын беру тарифтерін қалыптастыруды жетілдіру қарастырылуда»,-деді Б.Жақсалиев.

Оның сөзінше, электроэнергетика саласындағы қолданыстағы заң осы саладағы инвестициялық тартымдылықты толық қамтамасыз ете алмай отыр.

«Электр энергиясын тұтыну 2030 жылдары ерекше қарқынмен дамып, жылына 130 миллиард кВт сағаты құрайтын болады. Бұның барлығы да 60 пайызы ескірген қолданыстағы электр стансаларының жағдайына әсер етеді. Жылу электр стансаларының орташа пайдалану мерзімі 28,8 жылды құраса, су электрсансаларынікі 35,7 жыл болып отыр»,-деді вице-министр.

Осылайша, Б.Жақсалиевтің айтуынша, қалыптасқан мәселені шешу үшін энергия өндіретін электр стансалары үшін нақты міндеттемелері бекітілген ұзақмерзімді инвестициялық келісімдер жасау мәселесі ұсынылуда. Сонымен қатар заң жобасына сәйкес, электр энергиясы саласындағы нарықтағы қарым-қатынастардың ашықтығын қамтамасыз ету мақсатында нарық кеңесін құру керек.

Камила Амирова

Барлық жаңалықтар