ҚТЖ жекешелендіру бағдарламасының аясында 14 активті жүзеге асырды
Жекешелендірудің екінші толқынының аясында «Самұрық-Қазына» акционерлік қоғамы 106 активті жүзеге асыруды көздеп отыр. Бүгінгі таңда бәсекелес ортаға 26 еншілес және тәуелді ұйымдар енгізіліп үлгерген. Қордың ең үлкен еншілес кәсіпорны «Қазақстан темір жолы» ҰК» АҚ 35 нысанды саудаға салғалы отыр.
«Активтерді жүзеге асыру жұмыстары басталғалы 2014 жылы ұлттық тасымалдаушы компания еншілес және тәуелді компаниялармен құны 23 миллиард 265 миллион теңге болатын сатып алу- сату туралы 14 келісім жасаған. Аталған нысандардың бағалау құны 18 миллиард 144 миллион теңгені құрады»,-делінген хабарламада.
Хабарламада сондай-ақ биылғы жылдың 1-сәуірнен бастап, «Көлік қызметі орталығы» акционерлік қоғамының 100 пайыз акцияларын сату туралы келісім жасалғандығы айтылған. Аталмыш орталық маневр жұмыстары, жүк салу мен түсіру, вагондарды арнайы құрылғылармен кіргізу және шығару, жүк салуға қажетті арнайы техникаларды жіберу, жүкке қоюға қажетті арнайы қоймалар тауып беру сияқты көптеген қызмет түрлерін көрсетеді.
