2015 жылы 27,3 мың гектар алқаптағы суару жүйелері қайта жөнделеді – АШМ
2015 жылы Алматы облысының Көксу ауданында және Жамбыл облысының Жамбыл ауданында 27,3 мың гектарды құрайтын алқаптағы суару жүйелері қайта жөнделеді, деп хабарланды Ауыл шаруашылығы министрлігінен.
«Жыл сайын Алматы және Қызылорда облыстары су тапшылығын сезінуде, бұл жағдай әсіресе судың аз кезінде ерекше күрделенеді. Аталмыш мәселені шешу үшін 2 текше километр су ресурстарын үнемдеуге мүмкіндік беретін ерекше ұсыныстар енгізілуде. Қазіргі таңда Сырдария өзенінде бір бөгет іске қосылып, енді екіншісінің құрылысы жүргізілуде. Тап осындай құрылғылар Іле өзенінде де орналасатын болады», -делінген хабарламада.
Бұған қоса АШМ-нің Су ресурстары комитеті Бүкіләлемдік банк, Ислам даму банкі, Еуропалық қайта құру және даму банкі сияқты халықаралық қаржы институттарының инвестицияларын тарту мақсатында келіссөздер жүргізуде. Сонымен қатар жаңа тариф саясаты жүргізілуде. Оған сәйкес, тарифтердің жаңа деңгейі инвестициялық жобаларды жүзеге асыруға жұмсалған шығындарды жабатын болады.
Естеріңізге сала кетейік, Қазақстанның су ресурстарын басқару мемлекеттік бағдарламасы бойынша 5 мақсатты индикаторлар анықталған, олардың бірі қосымша су ресурстарын 2020 жылға дейін 0,6 текше километрге жеткізуді қарастырады.
