Астана әкімдігі әр ардагерге 1 млн 100 мың теңгеден төлемақы береді
5 Сәуір, 2015 12:58
Астана қаласы Жұмыспен қамту және әлеуметтік бағдарламалар басқармасының мәліметінше, елордада қазіргі таңда 210 Ұлы Отан соғысының ардагері тұрып жатыр, олардың 161-і соғысқа қатысқандар және 49 ҰОС мүгедектері. «Алматы» ауданында 107, «Есіл» ауданында – 87 және «Сарыарқа» ауданында – 16 ардагер бар, деп хабарлады қала әкімдігі.
Ұлы Отан соғысындағы Жеңістің 70 жылдығына арналған іс-шаралар жоспарының негізінде ҰОС ардагерлерін әлеуметтік қорғау шаралары қарастырылған.
Жергілікті бюджет есебінен ҰОС Жеңістің 70 жылдығына орай қала әкімдігі елордада тұрып жатқан әр ардагерге 1 миллион 100 мың теңгеден төлемақы береді, одан өзге жергілікті бюджеттен ҰОС ардагерлері мен мүгедектеріне 100 мың теңгеден төленеді. Сонымен қатар, Астана қаласында тұрып жатқан екі ардагерге Мәскеу қаласында өтетін Жеңістің 70 жылдығына арналған Парадқа қатысу үшін жол, тамақтану, тұру шығындары өтелетін болады.
Ақшалай төлемдерді сондай-ақ тыл еңбеккерлері, ҰОС қатысушылардың жұбайлары мен ҰОС ардагерлеріне теңгерілген тұлғалар да алатын болады.
