ШҚО мен Литваның тауар айналымы 6,8 млн долларды құрады

Екі ел арасындағы тауар айналымы былтыр 1,1 млрд. АҚШ долларын құраса, сәйкесінше ШҚО мен Литва Республикасы арасында 6,8 млн. АҚШ долларының алыс-берісі жасалып, оның көлемі 2013 жылмен салыстырғанда 6,1 пайызға артқан. Соңғы жылдары ШҚО - Литва арасында металлургия мен ауыл шаруашылығы салаларындағы байланыс дамып келеді. Д.Ахметов ендігі кезекте өзге бағыттарға да мән беретін кез жеткендігін атап өтті.

«Мемлекет басшысы Нұрсұлтан Назарбаев ел экономикасын әртараптандыру жөнінде нақты тапсырмалар жүктеді. Яғни, елде шикізаттық тәуелділіктен арылуға айрықша көңіл бөлінуде. Ауыл шаруашылығы, туризм салаларында да ШҚО әлеуеті зор. Мәселен, өңірде сүт өндірісін, қой өсіру ісін дамыту көздеп отырмыз. Осы жағынан Литвадан үйренеріміз көп. Сондай-ақ, біз балық шаруашылығы саласында тәжірибе алмасуға дайынбыз», – деді облыс әкімі.

Өз кезегінде Витаутас Наудужас ШҚО әр салада байланысты нығайтудың маңыздылығына тоқталды.

«Расымен де, ШҚО – еліңіздегі көшбасшы өңірлердің бірі. Мұнда күн батареяларының пластиналары шығарылады екен. Соңғы жылдары Еуропада электр энергиясын үнемдеу күн тәртібіндегі мәселелердің біріне айналғанын ескерсек, аймақтарыңызбен осы салада байланыс орнатуға айрықша мүдделіміз. Есесіне, сіздермен лазерлік технологияларды қолданудағы тәжірибемізбен бөлісуге әзірміз, – деген В. Наудужас екі ел арасындағы транзиттік-көліктік ынтымақтастықты дамыту – өзара қарым-қатынастың маңызды тармағы екенін, бұл тұрғыдан ШҚО екі мемлекетпен шектесетіні ұтымды болып тұрғанын жасырмады. – Бүгінде екі ел арасында 3 теміржол бағыты жұмыс істеп тұр. Енді осы және өзге бағыттармен жүзеге асатын алыс-берістің көлемін арттыруға күш салу керек», – деді В. Наудужас.

Аймақ басшысы Д.Ахметов елшінің айтқанын қолдап, ШҚО-на литвалық ғылыми қызметкерлер мен кәсіпкерлерді шақыру ойын білдірді.