Сенат депутаты мен БҰҰ арнайы баяндамашысы құқық қорғау саласындағы ынтымақтастықты нығайту мәселесін талқылады

3 Сәуір, 2015 15:07

Парламент Сенатының депутаты Ерболат Мұқаев БҰҰ-ның Уландырғыш және қауіпті өнімдердің, қалдықтардың заңсыз тасымалы мен көмілуінің адам құқықтарына кері әсері жөніндегі арнайы баяндамашысы Баскут Тункакпен кездесті.

Сенат өкілдерінің хабарлауынша, әңгіме барысында Е.Мұқаев Қазақстанның адам құқықтарын қорғау мен қолдау бағытындағы халықаралық ынтымақтастық аясында ашықтық принципінің жақтаушысы болып келгендігін және болып қала беретіндігін атап өтті.

Е.Мұқаев мәртебелі мейманды қазақстандықтардың ҚР Конституциясында бекітілген экологиялық құқықтары мен Экологиялық кодекс талаптарының жүзеге асырылу жұмыстарымен таныстырды. Қазақстан құқық қорғау саласындағы көптеген келісімдерді ратификациялады, елімізде нормативті-құқықтық база мен адамзат өлшеміндегі тәжірибелік шараларды жетілдіруге бағытталған 2010-2020 жылдарды қамтитын құқықтық саясат Тұжырымдамасы жүзеге асырылуда. Жақында 2020 жылға дейінгі адам құқықтары саласындағы жаңа Ұлттық іс-қимыл жоспарын дайындау жоспарлануда.

Кездесудің соңында тараптар құқық қорғау саласында ынтымақтастықты алдағы уақытта да нығайта беру қажеттігін айтты.