Қостанайда 2015 жылғы көктемгі дала жұмыстарына қатысты агрономиялық мәжіліс өтуде

Қостанайдың спорт сарайында және оған қарасты аймақта «Агронауқан-2015» ауыл шаруашылығы көрмесі өтуде. Көрмені облыстық ауыл шаруашылығы басқармасы ұйымдастыруда және ол екі күн қатарынын өтеді.

Көрме аясында облыстың ауыл шаруашылығы өнімін өндірушілер үшін 4 бағыт бойынша секциялар жұмыс істеуде. Олар: механизация, мал шаруашылығы мен қайта өңдеу, тұқым шаруашылығы және гербицидтер. Қостанай облысының 60 кәсіпорны мен Ақмола, Қарағанды, Солтүстік Қазақстан облыстары және Мәскеу қаласы мен Ресей Федерациясының Челябі облысының өкілдері қостанайлық аграрилерге өздерінің өнімдерін ұсынды. Сондай-ақ көрмеде 35 бірлік ауыл шаруашылығы техникасы мен құрылғылары қойылды.  

Әкімдік өкілдерінің хабарлауынша, мұндай ауыл шаруашылығы көрмесі жылына екі рет ұйымдастырылатын болады. Сонымен қатар агрокеңестің пленарлық мәжілісі өтеді. Пленарлық отырысқа қалалар мен аудан әкімдері және облыстық ауыл шаруашылығы басқармаларының басшылары мен дәнді дақылдармен айналысатын барлық ұйым, мекеме өкілдері атсалысады. Онда Қостанай облысының агроөнеркәсіп кешенін дамыту бойынша өзекті деген мәселелер талқыға түседі.   

«Біз өткеннен сабақ ала білуіміз керек. Өйткені көктемгі-дала жұмыстарын өткізу өте жауапты әрі жанкешті еңбекті талап ететін кезең. Оған барлық күш-жігерді жұмылдырып, науқанды уақытында әрі жоғары агротехникалық деңгейде аяқтау қажет»,- деді  облыс әкімі Нұралы Сәдуақасов.