Жеңістің 70 жылдығына арналған әскерлер парадына 180-нен астам әскери қызметші қыз-келіншек қатысады (Фото)

1 Сәуір, 2015 15:58

Қазақстан Қарулы Күштерінің әскери қызметші қыз-келіншектері Ұлы Отан соғысындағы Жеңістің 70 жылдығы қарсаңында өтетін әскерлер парадына ерекше көрік береді. Жалпы саны 186 парадқа қатысушы қыз-келіншек іріктеліп алынды.

Қорғаныс министрлігі хабарлағандай, олардың ішінде 32 әскери қызметші санитарлық нұсқаушы үлгісінде киініп, парадтың ҰОС кезеңіндегі тарихи бөліміндегі рота құрамында болса, ал қалған 154 әскери қызметші парадтың қазіргі заманғы бөлімінде алаңда қазақстандық әскери жоғарғы оқу орындарының курсанттарынан кейін жеке жаяу сапен адымдайтын болады.

Әскери қыз-келіншектер Қазақстанның төрт өңірлік қолбасшылығынан, Қарулы Күштердің барлық түрлері мен әскер тектерінің әскери бөлімдерінен, сондай-ақ ҚР Қорғаныс министрлігінің орталық аппаратынан жиналған. Осы уақытқа дейін әскери қызметшілер жеке-жеке жаттықты.

Олар жергілікті жерлерде саптық жарғыға сәйкес сап құрамында бірыңғай қарқын мен ырғақты, сап түзулігін сақтай отырып, жинақы және серпінді адымдауға дайындалды. Қазір олар бір лекте бірлескен жаттығуға кірісуге дайын. Даярлық барысында қатысушылар қажу-шаршау секілді қиыншылықтарды жеңе отырып, беріктік, төзімділік қасиеттерін көрсетеді.

Барлық жаңалықтар