Сауда Арабиясының өкілдері Астанада өтетін Әлемдік және дәстүрлі діндер лидерлерінің V съезіне қатысады
31 Наурыз, 2015 19:38
Қазақстан Республикасының Президенті Н.Назарбаевтың Арнайы уәкілі, Парламент Сенатының депутаты А.Мұсаханов Сауд Арабиясы Корольдігіне сапары барысында Дүниежүзілік ислам лигасының Бас хатшысы Абдалла әт-Түркимен кездесіп, оған алдағы Әлемдік және дәстүрлі діндер көшбасшыларының V съезіне шақыруды табыс етті.
Діни форум 2015 жылғы 10-11 маусымда Астана қаласында өтеді.
Сенатор Дүниежүзілік ислам лигасының Бас хатшысына ұлтаралық және конфессияаралық келісімнің қазақстандық моделі жөнінде, үстіміздегі жылы Қазақстан халықтары Ассамблеясының құрылғанына 20 жыл толатыны жайында айта келіп, жүздесушіні діни көшбасшылардың төртінші съезінің нәтижелері мен алдағы бесінші Съездің тақырыбы туралы хабардар етті.
Абдалла әт-Түрки Президент Н.Назарбевтың Діни көшбасшылар съезін шақыру туралы бастамасын жоғары бағалап, бүгінгі таңдағы халықаралық шиеленістер етек жайған шақта Қазақстан ынтымақ пен бірліктің, төзімділіктің озық үлгісін көрсетіп отырғанын атап өтті.
А.әт-Түрки Дүниежүзілік ислам лигасы алдағы V Съезд жұмысына белсенді қатысатынын айтты.
