Астана әкімдігі бірқатар министрліктермен ынтымақтастық жөніндегі меморандумдарға қол қойды (ФОТО)
Ел Үкіметі Мемлекет басшысының өндіріс үдерістерін тұрақтандыру мен екіжақты тиімді әріптестікті дамыту мақсатында әкімдіктер мен ірі кәсіпорындардың және орталық мемлекеттік органдардың арасында ынтымақтастық жөніндегі Меморандумдарға қол қою жөніндегі тапсырмасы бойынша кең ауқымды жұмыстар жүргізуде.
Осылайша, мәжіліс барысында Астана әкімдігі денсаулық сақтау, мәдениет, спорт, әлеуметтік қорғау, жұмыспен қамту және білім беру сияқты жұмыстарды қамтамасыз етумен айналысатын министрліктермен 2015-2017 жылдарға дейінгі аралықты қамтитын Меморандумдарға қол қойды.
Нақтырақ айтқанда, елорда әкімдігі Денсаулық сақтау және әлеуметтік қорғау министрлігімен екі Меморандумға қол қойды. Сондай-ақ Мәдениет және спорт министрлігімен де осындай келісімге келді. Білім беру ісін жетілдіру мақсатында әкімдік Білім және ғылым министрлігімен де ынтымақтастықта жұмыс істейтін болды.
Астана әкімі Әділбек Жақсыбековтың сөзінше, қол қойылған Меморандумдар әлеуметтік сала бойынша қызмет көрсететін министрліктермен бірлескен қимылдардың басым бағыттарын жүйелендіруге ықпал етеді.
Камила Амирова
Фото Азамат Алиев
