Қазақстанда егін егілетін жерлер 24 миллион гектарды құрайды - Бәзілжанов
«Бүгін мен ауыл шаруашылығы мақсатындағы жерлердің, нақтырақ айтқанда егін егілетін жерлердің құнарлылығына назар аударғым келіп отыр. Егін егетін жерлер қазір еліміз бойынша 24 миллион гектарды құрайды. Жер кодексінде жерді мәжбүрлі түрде алуды көздейтін 92-ші және 93-ші баптар бар. Кодекстің осы баптарын орындау мақсатында жерді тиімді пайдалану ережесі шықты. Онда гумус деңгейі 5 пайыздан азайып, ал азоттың жылжымалы пішіндері мен калийдің мөлшері 20 пайызға жетсе, мұндай жерлер иелерінен қайтарып алынады»,-деді Е.Бәзілжанов.
Оның сөзінше, агрохимия қызметінің зерттеулері бойынша, жергілікті атқарушы орган өкілдері егін егетін жерлердің құнарына назар аудармаған жер иеленушілерден жерлерін қайтарып алады.
«Араға 5-7 жыл салып егістік жерлер тағы да зерттелетін болады. Ол үшін Қазақстандағы Орал, Талдықорған, Шымкент, Павлодар сияқты қалаларда 4 филиал бар»,- деді Е.Бәзілжанов.
Агрохимия қызметі топырақты химиялау, жер иеленушілердің қызметін мемлекеттік реттеу арқылы агрохимиялық талдаулармен қамтамасыз ету, жердің құнарлылығына мониторинг жүргізу сияқты жұмыстармен айналысады. Бүгінгі таңда минералды тыңайтқыштарды пайдалану 1 гектарға 4 келіден келіп отыр және бұл көрсеткіш жыл өткен сайын артуда.
