«Астана ЭКСПО-2017» ҰК» АҚ делегациясы Аустрияда халықаралық ұйымдармен ынтымақтастық орнату мәселесін талқылады

31 Наурыз, 2015 15:08

«Астана ЭКСПО-2017» ҰК» АҚ Басқарма орынбасарының төрағасы Вера Кобалия бастаған делегация Венадағы халықаралық ұйымдармен ынтымақтастықты орнату және Аустрияда ЭКСПО-2017 көрмесін ілгерілету мақсатында альпы республикасына сапар шекті.

ҚР Сыртқы істер министрлігі хабарлағандай, Ұлттық компания өкілдері БҰҰ-ның Венадағы бөлімшесінде өткен «Баршаға орнықты энергетика» бастамасын іске асыру жөніндегі Консультативті кеңес шерпа (арнайы өкілдер) кездесуіне қатысты. Консультативті кеңес алдында сөз сөйлеген В. Кобалия ЭКСПО-2017 мен БҰҰ бастамаcы арасында ынтымақтастық үшін үлкен мүмкіндіктер бар екенін атап өтті. Кездесу қорытындысы бойынша Астана ЭКСПО-2017 компаниясы мен «Баршаға орнықты энергетика» бастамасы арасында екі мекеменің ынтымақтастық бағыттарын айқындаған өзара түсіністік меморандумға қол қойылды.

Сонымен қатар, ұлттық компания делегациясы 2015 жылы желтоқсанда өтетін Біріккен Ұлттар Ұйымының Өнеркәсіптік даму ұйымының (ЮНИДО) Бас конференциясы шеңберінде сайд-ивент (қатар шаралар) өткізу мәселесі бойынша ЮНИДО хатшылығымен, ал «Кедейлер үшін орнықты энергетика» бастамасы шеңберінде ОПЕК Халықаралық даму қорымен (ОФИД) ынтымақтастықты талқылау мақсатында ОФИД өкілдерімен кездесті.

В. Кобалия Аустрияның Федералды Ғылым, зерттеу және экономика вице-министрі Бернадетте Гирлингер және Аустрия Экономика палатасының вице-президенті Ричард Шенцпен кездесіп, көрмені өткізу үшін жасалып жатқан дайындық туралы ақпараттандырды. Аустрия өкілдері ЭКСПО-2017 көрмесіне зор қызығушылық танытты.

Аталған сапар Венадағы БҰҰ жүйесінің ұйымдарымен ынтымақтастықтың басымды бағыттарын айқындауға мүмкіндік берді.