Елбасы ҚР федерациясының құрметті президентімен бұқаралық спортты дамыту мәселелерін талқылады
31 Наурыз, 2015 12:47
Елбасы Қазақстан күрес федерациясының құрметті президенті, Халықаралық біріккен күрес түрлері федерациясының Бюро мүшесі Дәулет Тұрлыхановты қабылдады, деп хабарлады Ақорданың баспасөз қызметі.
Кездесу барысында елде бұқаралық спортты дамыту, соның ішінде жас ұрпақты спортқа баулу мәселелері талқыланды.
Қазақстан Президенті жастар арасында саламатты өмір салтын насихаттаудың, сондай-ақ жоғары жетістіктер спортын дамытумен қатар халықтың дене шынықтырумен және спортпен белсене айналысуы үшін қажетті барлық жағдайды жасаудың маңыздылығына тоқталды.
Д.Тұрлыханов отандық спортқа Мемлекет басшысының көрсетіп отырған қолдауы нәтижесінде ірі қалаларда ғана емес, шалғай өңірлерде де қажетті инфрақұрылымдар салынып жатқанын айта келіп, сол үшін алғыс жеткізді. Бұл жағдай қажетті іргетас қалауға мүмкіндік беріп, соның негізінде Қазақстан спортшылары өңірлік және халықаралық жарыстарда жоғары нәтижелерге қол жеткізіп жатқанын атап өтті.
