С. Омаров: Ауыл шаруашылығы өнімін өндірушілердің барлығы тұқыммен толық қамтамасыз етілген

31 Наурыз, 2015 11:07

Ауыл шаруашылығы өнімін өндірушілердің барлығы тұқыммен толық көлемде қамтамасыз етілген, деп хабарлады бүгін Ауыл шаруашылығы вице-министрі Сапархан Омаров Орталық коммуникациялар қызметінде.

«Барлық шаруашылықтардағы дәннің көлемі нақтыланды. Тауар өндірушілерді тұқыммен қамтамасыз ету мақсатында «Азық түлік корпорациясы» акционерлік қоғамы арқылы қаржы бөлініп, оған тұқым сатып алынды. Бүгінгі таңда облыстардың ауыл шаруашылығы басқармаларының берген мәліметтері бойынша ауыл шаруашылығы өнімін өндірушілердің барлығы тұқыммен толық қамтамасыз етілген»,-деді министрдің орынбасары.

Бұған қоса ол аймақтардың ауыл шаруашылығы басқармаларының мәліметтерінше, 2015 жылы 2,2 миллион тонна тұқым егіліп, бұл тұтынуға қажетті көлемнің 94 пайызын құрайтындығын атап өтті.

Олардың арасында дәнді дақылдар – 1,9 миллион тонна, майлы дақылдар - 50,4 мың тонна, мал азығы дақылдары- 29,4 мың тонна, картоп – 239,6 мың тоннаны құрайды. Осылайша бүгінгі таңда ауыл шаруашылығы өнімін өндірушілердің барлығы тұқыммен толық көлемде қамтамасыз етілді»,-деді вице-министр.

Индира Кауметова

Барлық жаңалықтар