ИИДМБ: Маңғыстау облысында биыл Индустрияландыру картасы бойынша 17 жобаны аяқтау жоспарлануда
«Аймақта негізгі капиталға деген инвестициялар көлемі 47,8 миллиард теңгені құрады. Аймақтың инвестициялық тартымдылығы индустриялық-инновациялық даму мемлекеттік бағдарламасын жүзеге асыру мен «Ақтау теңіз айлағы» аймағында арнайы экономикалық аймақты игеру жұмыстарының есебінен қамтамасыз етілуде. Осылайша, Индустрияландыру картасынының аясында 2015 жылы құны 104,6 миллиард теңге болатын 17 жобаны іске қосып, 1,5 мың адамды тұрақты жұмыспен қамтуды жоспарлап отырмыз. Биылғы жылдың бірінші тоқсанының өзінде бір жоба іске қосылып үлгерді. Ол құны 370 миллион теңгені құраған «КУДУ Индастриес Қазақстан» жауапкершілігі шектеулі серіктестігі болып отыр. Жобаның аясында 31 жұмыс орны ашылды»,-деді И.Құрман.
Сондай-ақ ол сөзінде жаңа жобалар арқылы арнайы экономикалық аймақты игеру жұмыстарының белсенділігі артқандығын атап өтті. Мысалы арнайы экономикалық аймақ құрылғанда оның территориясында 5 кәсіпорын жұмыс істеген болса, 2014 жылы мұнда тағы 4 өндіріс іске қосылған.
«Айта кететін мәселе арнайы экономикалық аймақтың барлық инфрақұрылымын қалыптастыруға соңғы 5 жылда 7 миллиард теңге көлемінде бюджет қаржысы шығындалды. Бүгінгі таңда жұмсалған қаржы өзін ақтады деп нық сеніммен айтуға болады. Арнайы экономикалық аймақтағы кәсіпорындар 29 миллиард теңге тартып, 223 милллиард теңгенің өнімін өндірді. Мыңнан астам жұмыс орындары ашылды»,-деді басқарма басшысының міндетін атқарушы.
