Талдықорғанда қант қызылшасымен айналысатын кәсіпорындарға арнайы техникалар табыс етілді (ФОТО)
«Жетісу» әлеуметтік кәсіпкерлік корпорациясы (ӘКК) Алматы облысы әкімдігінің қолдауымен дайындау орталықтарының аясында машина-тракторлық стансаларды қалыптастыру мақсатында Кедендік Одақ пен алыс шет мемлекеттерден арнайы техника сатып алуды қарастыратын 1 миллиард теңгенің жобасын жүзеге асыруда. Аталған жоба аясында осы уақыттың өзінде Қаратал, Көксу, Ескелді, Сарқан аудандарында 6 қызмет көрсету дайындық орталықтары құрылды.
Әкімдік таратқан мәліметтерге сәйкес, бүгінгі таңда 32 трактор, 11 комбайн, 6 жүк артқыш техника, 72 аспалы, тіркегіш техника сатып алынған. Аталмыш құралдар жеңілдетілген шарттар негізінде қаржы лизингіне берілді.
Айта кететін мәселе 2011-2015 жылдар аралығында ауыл шаруашылығы тауарларын өндірушілерді қызмет көрсету, агротехникалық, қамтамасыз ету сияқты өзге де қызметтермен қамтамасыз ету мақсатында 10 ауданда 18 қызмет көрсету дайындық орталықтары құрылып, 3 миллиард теңгеге 500 бірлік ауыл шаруашылығы техникасы сатып алынған.
Осылайша облыста шаруа қожалықтарының қызметін нығайту мен қант өндіруді дамытуға барлық мүмкіндіктер жасалып отыр.
