Қазақстанда 2017 жылға дейін апатты және үш ауысымды мектептердің орнына 73 мектеп салынады - БҒМ

26 Наурыз, 2015 10:50

Қазақстанда 2017 жылға дейін апатты және үш ауысымды мектептердің орнына 73 мектептің құрылысы қарастырылған, деп хабарлады білім және ғылым вице-министрі Есенғазы Иманғалиев Орталық коммуникациялар қызметінің баспасөз мәслихатында.

Қазақстан Республикасы білім және ғылым министрлігі жергілікті атқарушы органдармен бірге Ұлттық қор қаржысы есебінен апатты және үш ауысымды мектептерді жою мақсатында салынатын мектептер санын анықтады.

«Мемлекет басшысының «Нұрлы жол- Болашаққа бастар жол» Қазақстан халқына жолдауы аясында жүргізілген жұмыстары нәтижесінде 2015-2017 жылдары 61,9 млрд теңгеге Ұлттық қор қаржысы есебінен 73 мектептің құрылысы жоспарланып отыр», - деді Е.Иманғалиев.

Атап айтсақ, 2015 жылы 14,3 млрд теңгеге, 2016 жылы - 23,09 млрд теңгеге, 2017 жылы 24,5 млрд теңгеге мектеп құрылысы қарастырылған.

Осылайша, вице-министр атап өткендей, үш ауысымды оқуды жою үшін Ұлттық қор есебінен 57, апатты мектептердің орнына 16 мектеп құрылысы қарастырылған.

Камила Амирова