ШҚО әкімдігі халықаралық «Unit Group» компаниясымен ынтымақтастық орнатуға мүдделі

 Кездесу барысында Даниал Ахметов өңірдің жан-жақты саладағы әлеуетін айтып өтті.

«Шығыс Қазақстан облысы еліміздегі өнеркәсіп өндірісі дамыған қала. Дүние жүзінде берилли өндіретін ірі 3 зауыттың біреуі біздің өңірде. Жақын уақытта тау-кен байыту саласында әлемдік стандарттарға сай екі комбинаттың құрылысын аяқтаймыз. Сол секілді ауыл шаруашылығы саласында өңіріміздің әлеуеті жоғары. Аймақ туристік кешендерді тұрғызуға әбден лайық. Сондықтан, біз жан-жақты салада жұмыстарды біріге атқарамыз деген сенімдемін», – деді Д.Ахметов.

Өз кезегінде Унал Айсал әлемнің 8 елінде табысты еңбек етіп жатқан «Unit Group» халықаралық компаниясының ШҚО аумағында жұмыс істеуге ниетті екенін жеткізді.

«Компания негізінен электрлік салада электростанцияларды тұрғызып, пайдалануға беру жұмыстарымен айналысады. Біз Қазақстанда жан-жақты келісімге отырып, серіктестікті нығайтуға ниеттіміз», – деген ол өңір басшысын алда келе жатқан Наурыз мерекесімен құттықтады.

Кездесу барысында қос тарап мемлекеттік-жекеменшіктік серіктестік аясында Бұқтырма су қоймасы арқылы көпірдің құрылысын жүргізу мәселесін талқылады.

Айта кетерлігі, «Unit Group» компаниясы Таяу Шығыстан бастап, Еуропаның Бельгия, Хорватия, Люксембург сынды бірқатар елдерінде жұмыс істеп келеді.