Г.Әбдіқалықова БҰҰ балалар қорының (ЮНИСЕФ) Қазақстандағы өкілімен кездесті

12 Наурыз, 2015 13:37

Мемлекеттік хатшы, Президент жанындағы Әйелдер ісі және отбасылық-демографиялық саясат жөніндегі Ұлттық комиссия төрайымы Гүлшара Әбдіқалықова БҰҰ балалар қорының (ЮНИСЕФ) Қазақстандағы өкілі Ю.Оксамитныймен кездесті, деп хабарлады Ақорданың баспасөз қызметі.

Кездесу барысында балаларды қорғаудың өзекті мәселелері, білім, денсаулық сақтау және әлеуметтік даму салаларындағы ынтымақтастықтың алдағы келешегі талқыланды.

Г.Әбдіқалықова Ю.Оксамитныйды осы лауазымға тағайындалуымен құттықтап, Қазақстан мен ЮНИСЕФ арасындағы табысты ынтымақтастықтың жалғасатынына сенім білдірді.

Мемлекеттік хатшы ЮНИСЕФ-тің әлемдегі және Қазақстандағы балалардың жағдайын жақсартудағы маңызды рөлін, сондай-ақ елдегі мемлекеттік органдар БҰҰ-ның даму мақсатында көмек көрсету жөніндегі негіздемелік бағдарламасын (ЮНДАФ) орындау бағытында белсенді жұмыс жүргізіп отырғанын атап өтті.

ЮНИСЕФ-пен өзара байланыс арқылы және 2010-2015 жылдарға арналған Елдік бағдарламаның аясында отбасы мен қоғамның әлеуетін нығайту, әлеуметтік және басқару саясатын әзірлеу, әлеуметтік қорғау жүйесін жетілдіру жөніндегі іс-шаралар табысты жүзеге асырылуда. Бағдарлама басымдықтарының бірі Оңтүстік Қазақстан мен Шығыс Қазақстан облыстарының, бұған қоса Семей сынақ алаңы мен Арал аймағындағы балалардың жағдайын жақсарту болып табылады.

Ел Үкіметі тарапынан БҰҰ-ның балалар құқықтары жөніндегі комитеті ұсынымдарын орындауға, ювеналдық юстиция жүйесін дамытуға, балалар еңбегін қанаудың алдын алуға, жетім балаларға қатысты отбасы тәрбиесінің баламалы түрлерін енгізуге, мүгедек балаларды айрықша мұқтаж нәрселермен қамтамасыз етуге бағытталған шаралар қабылдануда.

Барлық жаңалықтар