ҚР ҚМ десантшылары 60 шақырымға шеру жасады
Таң сәріде 32363 әскери бөлімі десанттық-шабуылдау батальонының ұлан капитаны Ерік Айдаровтың басшылығымен бригада алға жылжыды. Ал кешке 60 километрді жаяу бағындырған әскери қызметшілер тұрақты орналасу орнына қайта оралды.
Қашықтықты бағындыруда сарбаздар қосымша жүктермен, яғни бронекеудешелер, зат қапшықтар, дулығалар, автоматтармен толық жабдықталды. Жауынгерлік даярлық жоспарына сәйкес Аэроұтқыр әскерлерінің десанттық-шабуылдау бөлімшесі көп километрлі шеруді ай сайын жасауы тиіс.
« Осындай шерулер төзімділікті шыңдау, мінезді ширату және тұлғаның сымбатын арттыру мақсатында өткізіледі. Аталмыш жағдайда сарбаздың ұжымдық, әскери бауырластық сезімдері, өз кәсібіне және Аэроұтқыр әскерлеріне деген мақтанышы арта түседі. Десантшылар өз міндеттерін үздік атқарды, ешкім қашықтықтан қалыс қалмай, бірыңғай сапта келді», – деп атап өтті десанттық-шабуыл бригадасы командирінің тәрбие жұмыстары жөніндегі орынбасары майор Талғат Өзехан.
