Н. Назарбаев: Құқық қорғау органы қызметкерлерінің мәртебесін көтеріп, олардың азаматтар алдындағы жауапкершілігін арттыру керек

«Құқық қорғау органы қызметкерлерінің мәртебесін көтеріп, олардың азаматтар алдындағы жауапкершіліктерін артыру керек. Елде ақпараттық технологияларды дамыту, полицияның шолғыншылар қызметін бейнетіркегіштермен қамтамасыз ету сияқты құқық қорғау органдары қызметінің ашықтығын қамтамасыз ететін кең ауқымды шараларды ойластыру қажет.  Кәсіби психологиялық іріктеудің жаңа, тың жүйелерін енгізіп, біліктілік деңгейін ұдайы бақылап отыру керек»,-деді Елбасы.

Мемлекет басшысы сондай-ақ 5 институционалды реформаның бірі заң үстемдігін қамтамасыз етуге бағытталғандығын атап өтті. «Еліміздегі экономикалық өсімді қамтамасыз ететін меншік құқығын қамтамасыз ету, кәсіпкерлік қызметіне жағдай жасау, келісімдік міндеттердің орындалуын қорғау сияқты шараларды жүзеге асыратын тәуелсіз сот болуы керек. Бүгінде сот жүйесінің ең әлсіз тұсы -   судьяларды іріктеу, судьяларға қойылатын біліктілік талаптарының  тиімсіздігі жемқорлық әрекеттеріне әкеліп соқтыруда», -деп жалғады сөзін Ұлт көшбасшысы.

«Біз көптеген бағыттар бойынша алға шықтық, тап осы сала бойынша ілгері жылжи алмай отырмыз. Судьялар қоғам үшін жабық болмауы керек және олар сынды көтере алатын болуы қажет. Ашықтық пен сын – жемқорлықтан айықтыратын дәрі еспеттес.  Сонымен қатар ішкі істер саласы да қоғам үшін құпияға айналған. Полиция қоғам өкілдерінің сеніміне ие болуға ұмтылуы керек»,  - деп жалғады сөзін Нұрсұлтан Назарбаев.   

Естеріңізге сала кетейік, бүгін Астанада «Нұр Отан» партиясының кезекті XVI съезі өтіп, онда «Нұр Отан» партиясының атынан қатысқан делегаттардың шешімімен Нұрсұлтан Назарбаев бірауыздан ҚР Президенттігіне кандидат болып ұсынылды.

Индира Кауметова