ҚР ҚК-дегі жалғыз мерген қыз Жеңістің 70 жылдығына арналған әскерлер парадына қатысады
Кіші сержант Динара Рысбекова әйел затына сай емес көрінетін осындай мамандықты шебер меңгерген.
«Мен мерген батырымыз Әлия Молдағұлова туралы фильмді көргенім әлі есімде, әрдайым оның батылдығына сүйсініп, оған ұқсауды армандайтынмын. Бұл оңай мамандық емес. Қар мен жаңбыр, аяз бен боран сияқты ауа-райының түрлі құбылыстарына қарамастан әрқашан командир мен әріптестерді ұятқа қалдырмай оқу-жаттығу тапсырмасы болса да орындауға дайын болуың қажет», - деп әңгімелейді Динара Рысбекова.
Мерген қыз өзінің шеберлігін жаттықтығулар барысында үнемі шыңдап келеді. 44736 әскери бөлімінде жауынгерлік ату жаттығулары – апта сайын өтетін іс-шара. Осымен қатар қазіргі уақытта әскери қызметші қызымыз әскери қызмет жолындағы тұңғыш парадына, Ұлы Отан соғысындағы Жеңістің 70-жылдығын мерекелеу құрметіне биыл мамыр айында өтетін парадқа қатысуға дайындалып жүр.
«Парадқа қатысу – маған Қазақстан әскері үшін мақтанышымның белгісі. Бұл сезімім Президентіміздің қабылдауында болғаннан бері одан әрі күшейе түсті. Елбасымыз бізді биік істер мен ұмтылыстарға шабыттандырады», - дейді Д. Рысбекова.
