Үкіметте «Нұрлы жол» инфрақұрылымдық дамыту мемлекеттік бағдарламасы талқыланды

 Нақтырақ айтқанда, Үкімет мүшелері 2015-2019 жылдарға арналған «Нұрлы жол» инфрақұрылымдық дамыту мемлекеттік бағдарламасының жетілдірілген жобасын талқылады.  

«Мемлекеттік бағдарламаның жобасы инфрақұрылымдық даму және дағдарысқа қарсы шаралар сияқты негізгі екі бағыттан тұрады», -деді Ұлттық экономика министрі Ерболат Досаев.

Бұл шаралар кешені отандық машинақұрылысын қолдау мен агроөнеркәсіп кешені субьектілерінің бәсекеге қабілеттілігін арттыру, «Бизнестің жол картасы -2020» бағдарламасы аясындағы жобаларды инфрақұрылымдармен қамтамасыз ету, ішкі нарықты техникалық реттеу арқылы қорғау сияқты шараларды қолдауға бағытталған.

Бұған қоса, отырыста автомагистральдар құрылысы мен әуе арқылы электр қуатын тарату жүйелерін құру сияқты жобаларды жүзеге асыру мен отандық тауар өндірушілерді қолдаудың кешенді шаралары талқыланды.

Мәжілісте Ауыл шаруашылығы министрі Асылжан Мамытбеков те баяндама жасап, жиналғандарды көктемгі далалық егіс жұмыстарына дайындық мәселелерінен хабар етті.

Оның мәліметтерінше, биыл еліміз бойынша ауыл шаруашылығы дақылдары 21,5 миллион гектар аумаққа егілетін болады. Ал көктемгі егіс көлемі 18,5 миллион гектарды құрайды. «Көктемгі далалық егіс жұмыстары белгіленген жоспар бойынша жүргізіліп келеді», -деді А.Мамытбеков.