ҚР ОСК: Президенттікке кандидат У.Қайсаров мемлекеттік тілден емтихан тапсыра алмады

9 Наурыз, 2015 18:38

Орталық сайлау комиссиясында мемлекеттік тілден емтихан тапсырған Қазақстан Республикасының президенттігіне кандидат Уәлихан Қайсаров өрескел қателер жіберіп, сыннан өтпей қалды. Бұл туралы лигвистикалық отырыс барысында ҚР Президенттігіне кандидаттарды мемлекеттік тілді еркін меңгергендігін анықтау жөніндегі лингвистикалық комиссияның төрағасы Мырзатай Жолдасбеков мәлімдеді.

Қазақстан Республикасының президенттігіне кандидат Уәлихан Қайсаров сыннан өтпеді, деп шешті Лингвистикалық комиссия.

«Шығарманың тақырыбын мүлде аша алған жоқ. Қате көп болды. Шығармада 23 орфографикалық, 5 пунктуациялық, 7 стилистикалық қате жіберген. Емтиханның екінші кезеңін жаман тапсырған жоқ, сөз сөйлегені жақсы, бірақ Ілияс Есенберлиннің шығармасын мағынасын түсінбей оқыды», - деді М.Жолдасбеков.

«Үшінші кезеңде Бауыржан Момышұлының қанатты сөздері берілсе де, ол кісі Кенесары хан туралы көп айтып кетті. Сонымен қатар, У.Қайсаровтың жеке анкетасындағы қателеріне тоқталайын. Ол кісі «басқа мемлекеттің азаматтығында тұрамын» деп жазған, яғни, анкетадағы сөйлемнің мағынасын түсінбеген. Туған жылындағы «туған» сөзін, «тұған», анкета 2015 жылдың наурызында толтырылған дегенде «наурыз» сөзін «науырыз» деп жазған. Бұл өте өрескел қателер»,-дейді комиссия төрағасы М.Жолдасбеков.

Осы талдаудан кейін лингвистикалық комиссияға сұрақ қойған У.Қайсаров: «Сіздер ТМД деп айтып отырсыздар. Бірақ, ТМД деген сөз сұрақта болған да жоқ, айтылған да жоқ. Сол ТМД-ны қайдан алдыңыз», - деді кандидат У.Қайсаров комиссия төрағасы Мырзатай Жолдасбековке.

«Мен оны ойлап тапқаным жоқ. Бұл бұрынғы Кеңес одағының құрамында болған мемлекеттердің 1991 жылғы желтоқсанда Алматыда құрған достастығы. Содан кейін біздің Тәуелсіздігіміз басталды. Сізге берілген тақырып – «Тәуелсіз мемлекеттер достастығы: тарихы мен бүгіні», - деді М.Жолдасбеков.

Индира Қауметова

Барлық жаңалықтар