• Басты
  • ШҚО-ның Жарма ауданында Қоғамдық келісім орталығы ашылды (ФОТО)

ШҚО-ның Жарма ауданында Қоғамдық келісім орталығы ашылды (ФОТО)

9 Наурыз, 2015 15:32
Қазақстан халқы Ассамблеясының 20 жылдық мерейтойына орай, Жарма ауданының Қалбатау ауылында Қоғамдық келісім орталығының салтанатты ашылуы өтті.

ШҚО-ның  Ақпараттық орталығынан хабарлағандай, славяндық «Бірлік», немістік «Айнхайт», шешендік «Бард» этномәдени бірлестіктерін біріктірген жаңа орталықтың құрамына еңбек ардагерлері, ауданның құрметті азаматтары мен әртүрлі ұлттың өкілдері енді. Аталмыш орталықтың жетекшісі болып Татьяна Пяткова тағайындалды.

Аталып өткендей, бүгінде облыста 110 этномәдени бірлестік, 9 Достық үйі жұмыс істейді.

«Бүгінгі күні өңірдегі Қоғамдық келісім орталықтарының қатарына елдегі достық пен келісімді күшейту үшін жұмыс атқаратын тағы бір ошақ қосылып отыр. Береке-бірлігіміздің іргесі сөгілмесін. Елбасымыздың сарабдал саясатымен «Қазақстан-2050» Стратегиясында белгіленген межелерге біз тек ынтымақ арқылы ғана жете аламыз», – деді ШҚО ҚХА хатшылығының меңгерушісі Еркінбек Аязбаев.

Айта кетерлік жайт, ауданда этносаралық келісімді нығайту, Қазақстан халқының рухани байлығы мен мәдениетін насихаттау жұмыстарына баса назар аударылып келеді. Шар қаласының Мәдениет үйінде «Ардагерлер хоры», «Нұр Отан» партиясының аудандық филиалында «Мұрагер» клубы, өнер мектебінде би топтары жұмыс істейді.

Ұйымдастырушылардың айтуынша, Қоғамдық келісім орталығының ашылуы 17 ұлттың өкілдері тұратын аудан халқы үшін әр ұлттың рухани-мәдени құндылықтарын байытуға, ауданның қоғамдық өмірінде этнотоптардың белсенділігін арттыруға зор септігін тигізеді.

Барлық жаңалықтар