Семейде медициналық кластер құрылатын болды

Аймақ басшысы онда медициналық кластердің салынатындығын, сол себепті мұнда медициналық туризмді дамытуға болытандығын айтты. Ал осыған қажетті жағдайлар жасау үшін кластердің абаттандыру жұмыстарына ерекше көңіл бөлінетін болады.  

Ақпарат орталығының мәліметтерінше, ШҚО әкімі Д.Ахметов бастаған делегация Семейдің оң жағалауындағы абаттандыру жұмыстарымен танысты. Алдан ала дайындалған жобаға сәйкес, жағалауда көшені жарықтандыратын құралдарды ауыстырып, көлемі 42x24 метр болатын каскад субұрқағын қайта жөндеп,  «Дастан» кинотеатрының айналасын көгеріштендіріп, өзге де бірқатар жұмыстарды жүзеге асыру қажет.  

«Бұл аймақ өте әсем көрінеді, сондықтан мұнда тағы балалар және спорт алаңын салу керек. Сондай-ақ мұнда да көлемді абаттандыру жұмыстарын жүргізген абзал. Семейде медициналық кластер салынады. Бұл осы аймақта медициналық туризмнің дамуына ықпал етеді. Сондықтан көріктендіру, көгеріштендіру жұмыстарын жеделдетіп аяқтау қажет»,-деді облыс басшысы.  

Сонымен қатар, көгеріштендіру жұмыстары үшін аймақ басшылары 2,5 миллиард теңге қарастырып отыр. Осы ретте айта кететін мәселе Семей стратегиялық темір жолдар мен автомобиль, су және әуе көліктерінің байланысқан күре жолдарына орналасқан. Бұл аймақтан Омск-Майқапшағай магистралды автокөлік дәлізі өтеді. Сол себепті қала көркінің әсем болуы оның туристік және инвестициялық тартымдылығын арттыруда маңызы зор.