Қарағанды облысының әкімі көпбалалы аналарды марапаттады

«Әйелдердің бүгінгі ұрпағы отбасының ғана ұйытқысы емес, қоғамдық өмірге де белсене қатысушылар болып табылады. Бұл еліміздің Президенті Нұрсұлтан Әбішұлы Назарбаев атап көрсеткендей, мемлекетіміздің дамуына әйелдердің қосып жүрген үлесі артып келе жатқанының айғағы», - деді кездесуді ашқан облыс әкімі.

Өңір басшысы көп балалы аналарға мемлекеттік наградалар – «Алтын алқа» және «Күміс алқа» тапсырды. Үй шаруасындағы әйел Гүлнар Жұмашева (Жаңаарқа ауданы), денсаулық сақтау саласының қызметкері Қарлығаш Смайылова (Қаражал қаласы), білім беру саласының қызметкері Нұргүл Иманбекова (Ақтоғай ауданы), кәсіпкер Рузалия Ахметова (Қарағанды қаласы) және үй шаруасындағы әйел Людмила Коваленко (Қарағанды қаласы) осындай марапаттарға ие болды.

Содан кейін өзара ашық пікір алмасу өтті, оның барысында Мемлекет Басшысының «Нұрлы жол – болашаққа жол» Қазақстан халқына Жолдауында қойылған міндеттерді іске асыруға әйелдердің қатысуы туралы сөз қозғалды.

13 баланы тәрбиелеп өсірген, мемлекеттік награда «Алтын алқа» иегері, еңбек ардагері Қайынжамал Әмірханова отбасылық құндылықтар мен дәстүрлерді нығайтудағы әйелдердің орнына тоқталды. «Эльпида» грек этномәдени бірлестігінің басшысы Ольга Попандопуло ұлтаралық келісім, татулық пен тұрақтылық барлық қазақстандықтардың қымбат қазынасы болып табылатынын атап көрсетті. Шахтинск қаласының «Тентек» шахтасының машинисі Айтжан Әбенова «АрселорМиттал Теміртау» компанисы Көмір департаментінің Қарағанды облысын әлеуметтік-экономикалық дамытуға қосып отырған үлесі жайында айтты.

Өңір басшысы кездесуге қатысушылардың барлығын келе жатқан мерейлі мейрамдарымен құттықтады.

«Еселі еңбектеріңіз үшін сіздерге үлкен рахмет айтқым келеді. Сіздер отбасы берекесін келтірумен қатар әр салада жемісті қызмет атқарып жүрсіздер. Баршаңызға амандық пен табыс тілеймін!»- деді кездесу соңында облыс әкімі Нұрмұхамбет Әбдібеков.