• Басты
  • «Оңтүстік» өңірлік қолбасшылығында «Танк биатлоны – 2015-ке» қатысуға үміткерлер іріктелді (Фото)
5 Наурыз, 2015 20:24

«Оңтүстік» өңірлік қолбасшылығында «Танк биатлоны – 2015-ке» қатысуға үміткерлер іріктелді (Фото)

«Оңтүстік» өңірлік қолбасшылығында танк экипаждарының жарысы аяқталды. Жарысқа қатысқан 15 экипаждан үш мықтысы таңдап алынды, енді олар қорытынды іріктеу кезеңіне қатысатын болады, деп хабарлады Қорғаныс министрлігі.
«Оңтүстік» өңірлік қолбасшылығында «Танк биатлоны – 2015-ке»  қатысуға үміткерлер іріктелді (Фото)

Олар Шымкент қаласы 35748 әскери бөліміндегі, Отар қаласы 21450 ә/б және Тараз қаласы 85395 ә/б танк батальондарының экипаждары. Осы жарыстар аймақтық іріктеу болып табылады және әрбір өңірлік қолбасшылықтар базасында өткізіледі. Нәтижесінде үш экипаж іріктеп алынып, ҚР ҚК Құрлық әскерлері деңгейіндегі қорытынды іріктеу кезеңіне өтеді.

Аягөз қаласындағы әскери база қорытынды іріктеу кезеңін өткізу орны болмақ. Осы жерде алты танк экипажы анықталып (үш негізгі, үш запастағы), олар «Танк биатлоны – 2015-ке» даярлыққа кіріседі және сол ауқымды халықаралық жарыста Қазақстан атынан өнер көрсететін болады. Әрбір танк экипажы жаттығуларда өз шеберліктерін көрсетуге бар күшін салады.

Олар үшін бастысы үйлесімділік. Жұмыстың үйлесімділігі мен әр экипаж мүшесі (танк командирі, көздеуші-оператор, механик-водитель) өзін және жалпы тапсырманы толық түсінгенде ғана берілген қашықтықты жылдам бағындыру және сол сияқты 900-ден 2 200 метрге дейінгі қашықтықта орналасқан түрлі нысаналарды дәл көздеу мүмкін болмақ.  
 

Барлық жаңалықтар