Ақтөбе қаласының ардагерлері "дабыл түймесі" бар ұялы телефондар алды

5 Наурыз, 2015 17:08

Ұлы Отан соғысындағы Жеңістің 70-жылдығына орайластырылған «Өмір желісі» республикалық әлеуметтік желісі аясында қалалық әкімдікте ардагерлермен кездесу өтіп, оларға «дабыл түймесі» орналастырылған ұялы телефондар табыс етілді.

Облыстың ішкі саясат басқармасы хабарлағандай, кездесуде қала әкімінің орынбасары Айгүл Арынғазиева құттықтау сөз сөйледі.

Іс-шарада «Евразийский Медиа Форум» Халықаралық қорының өкілі Давлетьяров Сабыржан және «Өмір жолы» қоғамдық қорының атқарушы директоры Нұрбеков Эрнар қатысты.

Олар қатысушыларды өтіп жатқан акция туралы және қатысушыларға ұялы телефон жұмысы туралы ақпарат беріп, бір топ ардагерлерге «дабыл түймесі» орналастырылған ұялы телефондарды табыс етті.

Ұялы телефон кәдімгі қондырғыдан ірілетілген сандары бар үлкен түймелерімен, әрбір әрекет дыбыспен сүйемелденетіндігімен, басқан кезде арнайы сигнал шығатын дабыл түймесімен ерекшеленеді.

Тұсаукесер өткізілгеннен кейін барлық ұялы қондырғылар қалалық Ардагерлер кеңесі арқылы ҰОС қатысушыларға берілетін болады.