Қазақстанның 200 үздік оқытушысы мемлекеттік грантқа ие болды

5 Наурыз, 2015 10:52

Астанада Қазақстан Республикасы Білім және ғылым министрі А. Сәрінжіповтың қатысуымен 2014 жылғы «Жоғары оқу орнының үздік оқытушысы» атағының иегерлерін марапаттау рәсімі өтті.

Білім және ғылым министрлігі хабарлағандай, еліміздің 57 жоғары оқу орнының 200 үздік оқытушысы мемлекеттік грантпен (2000 АЕК) марапатталады. Олардың ішінде 79 адам - ғылым докторы, 114 адам - ғылым кандидаты, 7 адам - PhD докторы, олар техникалық, педагогикалық, медициналық, ауыл шаруашылық, экономикалық, заңгер және басқа да ғылым салалары бойынша.

Мемлекеттік грант жоғары оқу орнының оқытушыларына ғылыми зерттеулерді жүргізуге және әлемнің үздік жоғары оқу орындарында тағылымдамадан өтуге, әртүрлі алыс және жақын шет елдердің белгілі жоғары оқу орындары ғалымдарының арасындағы халықаралық ынтымақтастықты күшейтуге мүмкіндік береді.

Аталған іс-шараны өткізу оқытушылардың педагогикалық шеберлігін және кадрлар даярлаудың сапасын арттыруға, жас ғалымдарды ғылымға тартуға мүмкіндік жасайды.

Барлық жаңалықтар