«Қазақстан 2050» Жалпыұлттық қозғалысы «Нұрлы жол» бойынша салынатын нысандарында жұмыс істеуге ниетті ауыл жастарын шақырады

4 Наурыз, 2015 17:48

Ақмола облысы Аршалы ауданы Жібек жолы ауылының пошта бөлімшесінде «Қазақстан 2050» Жалпыұлттық қозғалысының Кеңес Төрағасы Данат Жұмин және «Қазпочта» АҚ Басқарма Төрағасы Бағдат Мұсин жастармен кездесті, деп хабарлады «Қазақстан 2050» Жалпыұлттық қозғалысы.

Іс-шара 50 пилоттық ауылдардың бірінде өтті. «Қазпочта» АҚ тұрғындарға толыққанды ақпараттық қызмет көрсету үшін бұл ауылдардағы өз бөлімшелерін кеңжолақты интернетпен және басқа да қажетті техникалық құралдармен жарақтандырған болатын. Мұндай инфрақұрылымның болуы мемлекеттік бағдарламалар туралы ақпаратты тұрғындарға жеткізу жолдарын оңтайландырып отыр. Мұндай мүмкіндікті алғашқылардың бірі болып «Қазақстан 2050» Жалпыұлттық қозғалысының белсенділері пайдаланып көрмек.

Бүгінгі таңда, «Қазақстан 2050» Жалпыұлттық қозғалысы ауылдардағы «Қазпочта» АҚ-ның пошталық бөлімшесі арқылы «Нұрлы жол» бағдарламасы аясында салынатын нысандарға жұмысқа орналасуға ниетті жұмыссыз жастардан өтініш қабылдауды бастады. Өтінімдер 15 наурызға дейін қабылданады. Әр аймақ бойынша жасалған тізім жастарды әрі қарай жұмысқа орналастыру мүмкіндіктерін қарастыру үшін Үкіметке жолданатын болады.

Бүгінгі кездесу кезінде өтінім беру барысы, одан кейін ауыл жастарын жұмысқа орналастыру үшін «Қазақстан 2050» Жалпыұлттық қозғалысы тарапынан жасалатын қадамдар жайы толық түсіндірілді.

Сонымен қатар, осы жоба аясында тараптар «Қазақстан 2050» Жалпыұлттық қозғалысы мен «Қазпочта» АҚ арасындағы ынтымақтастық туралы Меморандумға қол қойды.

Барлық жаңалықтар