Ақтөбе облысында мемлекеттік жастар саясатын жүзеге асыруға 197 млн астам теңге бөлінді – әкімдік

4 Наурыз, 2015 10:53

Ақтөбе облысында мемлекеттік жастар саясаты бағдарламасын жүзеге асыруға 197,3 млн. теңге бөлінді, деп хабарлады аймақтың ІСБ.

Аталып өткендей, Мемлекеттік әлеуметтік тапсырыс аясында 27,2 млн.теңге бөлініп, барлығы 35 әлеуметтік-маңызды жоба іске асырылса, оның 22 аудандарда жүзеге асты.

«2006 жылдан жоғары оқу орындары мен колледж студенттері қалалық қоғамдық көліктерде жеңілдікпен жүреді және талантты жастар өкілдері жыл сайын стипендиямен марапатталып келеді. 2014 жылы жоғары оқу орындары, техникалық және кәсіптік білім беру ұйымдарының 297 студентіне жалпы соммасы 28,8 млн. теңге көлемінде стипендия тағайындалды», - делінген хабарламада.

«Жасыл ел» бағдарламасын жүзеге асыру үшін 119,4 млн. теңге бөлінді. Жазғы маусымда оқу орындарының студенттері, ауыл, жұмыссыз жастар және жасөспірімдер үйінің тәрбиеленушілері қатарынан барлығы 2585 жас жұмыс жасады.

Сонымен қатар, жастар ресурстық орталықтарына 4000 ға жуық облыс жастары әртүрлі бағытта кеңес алу мақсатында келді. Оның ішінде 2828 жасқа әлеуметтік-медициналық, 474 психологиялық, 311 заңгерлік кеңес беріліп, 484 жасты тұрақты жұмыс орындарына орналастыруға ықпал етілді.

Айта кетерлік жайт, облыста 233,7 мың жастар бар, бұл тұрғындардың 29,9% құрайды. Оның ішінде 149,3 мың қала жастары, 88,5 мың ауыл жастары.